【平民投資教室】錢俊：港股要堅持唔好放棄？
話說上周美股納指跌穿100天線，同時港股就升穿100天線，今年開局港股更跑嬴對方16%。錢俊認為今年港股就算你唔睇好，都一定要有貨。
恆生指數2021全年跌14%，低絕全球主要市場眾人皆知。但其實如果睇MSCI香港指數，只係跌6%左右。計埋公司派息只係蝕3%。再細睇恆指，60隻成份股中，有26隻股份過去一年係升嘅，當中有9隻更加升超過20%；另有14間股價都跌少過恆指，亦即係大部份恆指成份股都跑嬴指數。歸根究底，所謂港股不滯同恆指組成部份甚有關係。
參考恆指公司11月嘅指數單張，資訊科技（同時等於ATMX四股）比重為26%，僅低於金融板塊的36%。 而去年ATMX四股各跌22%至49%不等，完全係拖低恆指表現元凶。而藍籌表現最好嘅李寧、中石油同中信，三隻上年都升逾40%，但三股加埋只佔恆指2.7%，只係略比小米一隻股份佔比略高，對恆指貢獻可謂杯水車薪。
因此，錢俊會話上年恆指升唔起嘅原因，係指數組成比例唔夠分散，基本上科技加埋金融已經佔恆指超過一半，前者跌，後者唔升，恆指想升都難。
但風水輪流轉，投資講週期。唔好話今個月初，2017年港股曾升逾35%，比美股S&P500同期22%高一截。如果嗰一年無揸港股，真係跑輸人哋成條街。錢俊認為可以考慮美股為主，港股為副，趁港股市差時略為收集，市好就適時減磅兼換畫。
其次，與其淨係買盈富基金（HKG:2800），可以考慮加入一啲恆指較為少比重嘅板塊，務求令港股投資更為分散，比如之前已提及過嘅清潔能源、電動車、或者消費品、醫療等，呢類板塊都有相關ETF可供選擇。至於金融、科技股，由於恆指已有相當比重，已有盈富喺手就唔一定要增持。
3010：加入台韓印股平衡
另一個方式就係搵比盈富更好嘅選擇以避開跟死恆指走勢。其中一隻係安碩核心MSCI 亞洲（日本除外）ETF（HKG:3010），又或者係美股市場嘅iShares MSCI All Country Asia ex Japan ETF（US:AAXJ），兩者大同小異。
兩隻ETF都係投資日本以外嘅大型同中型市值亞洲上市公司。雖然中國股票佔基金比重超過36%，但已經比恆指近7成低得多，而且台灣、韓國、印度均各佔14%以上。行業方面，資訊科技比重雖達25%，但ATM佔基金比例加埋低過10%，因為基金有分散投資不同國家嘅公司，包括台積電、韓國三星、印度Infosys。金融行業則只有19%，當中有大家耳熟能詳嘅友邦、港交所、建行呢啲。非必需消費品及通訊板塊分別有14%及10%，行業分散度比恆指優勝。
睇埋表現，受累於中港股市同科技股慘淡表現，3010上年都蝕錢收場，但全年只係跌7%左右，加埋2.1%股息，相比恆指而言算可以收貨。雖然管理費0.28%比盈富嘅0.1%為高，但幫你投資埋其他亞洲上市公司，用之取代盈富可以講係一個選項。
以上觀點僅為個人分析，並不構成任何投資建議。
