阿懶：食自助餐比拼「回本未」好OUT

仲有一星期就到聖誕節，平時各有各忙的朋友，是難得相約共聚的好時間。小時候最愛食聖誕自助餐，是友儕之間最溫暖的回憶。朋友埋位，比拼「食咗幾多碟」、和「回本未」，仲有選出同枱「大食精」互相取笑，是最有趣的「小學雞」遊戲。只是，年紀大了，一次過食太多，開始吃不消，加上有朋友在環保機構工作，認為自助餐是製造最多廚餘的飲食模式，大力反對，久而久之，聖誕自助餐就不在聚餐考慮之列，成為友儕間的集體回憶。 

其實，這種「源頭減廢」的飲食選擇，近年愈來愈流行，香港人的惜食意識，確實亦提高不少。不過說「提高了」不代表就等於足夠，之前陪媽媽同大班親戚去兩日內地美食團，就見證「大嘥鬼」無處不在，美食團標榜兩日食足三次自助餐，內地酒店向以大堆頭及種類多見稱(當然未計質素)，只見人人手上食物都堆了個小山丘，滿枱盡是吃不完的食物，令我記起廚房大佬講過，一般人食自助餐平均食三碟，但食肆通常要預備六碟食物的份量。 

印象最深刻一次，是我剛坐下，正想食一碗現煮湯麵，但只吃了兩口，因為突然電話響，殊不知一放下筷子，竟然就有侍應到來收碗，以為我已經食完！我之後細細觀察，發現動作這樣快，不是因為要趕客，而是眼見好多食客，其實每樣食物都只淺嚐兩口就作罷，我不是這批食客心中一條蟲，自然無法確定這些食客是因為食物麻麻，所以咬兩啖就放棄，還是純粹貪新鮮貪得意，抱「咪執輸」想樣樣都試的心態。 

不過，姑勿論原因，有食肆為杜絕這種現象，已各出其謀。比較客氣的是放個「珍惜食物」的告示作溫馨提示；有餐廳就講明食剩的食物，會根據重量收取費用，不過要數最經典的，莫過於瑞士一間餐廳，老闆娘竟然在餐枱上放了幾張非洲飢民無得食搞到皮黃骨瘦的相片，再附加文字叮囑大家食得哂先好拎，雖然事後有人批評老闆娘過激趕客，但老闆娘就話成效顯注，枱上剩食急跌，唔知臨近聖誕，香港食肆有無人夠膽東施效顰？ 

 

文章只屬作者觀點，不代表本網立場。