余樂明：你覺得自己值幾多

如果有一日，老闆召你入房，遞個信封給你，打開一睇，原來係加薪信，正當你嘴角微微上揚時，赫然發現加幾多的一欄 – 竟然係 空嘅 。

黑人問號的你望向老闆，佢話︰「你覺得自己值加幾多，自己填。」

畀你，你會填幾多？

-------- 

呢個唔係一個幻想，唔係一個假設題。係真人真事。

從故事中的老闆口中聽完這件事後，我問︰「真係填幾多就加幾多？」眼前打扮樸實，雙手一看就知道係實幹型老闆e-banner創辦人陳剛雄（Chris）笑︰「係，佢敢填我敢加」。

打工多年，老實講有幾多次加完人工會令你落多兩錢肉緊返工丫。

「但如果係一個你自己決定的加幅，咁就唔同喇，你條氣順丫嘛，覺得老闆信你丫嘛。」Chris話同事一般都唔會獅子開大口，佢仲慳返唔使諗加幾多。

Chris管理公司的理念是讓員工「坐埋同一條船」，佢話作為老闆一定要懂得放權，讓員工放心又放膽去試，相信員工係最清楚知道如何「練精學懶」，用最高效的方法完成工作。

很多老闆，尤其初創、小微企的老闆都親力親為，或會低估了員工能力，員工的參與程度不高的話，對佢地黎講都未必係好事，滿足感同成就感對一個人係咪繼續做同一工作至關重要。

各位老闆可能會話︰「咁都要同事做到至得架！」啱，所以要請啱人，或令到佢變成啱嘅人。

以前在報館及電視台工作，為「成為自己認為更加啱嘅人」，我一直堅持進修，為了交學費，當年最愛的節目就是跑步，純粹因為唔使錢。員工進修，既要錢又要時間。但Chris會供同事去讀閒閒地幾十萬嘅EMBA。

「你唔驚佢讀完就走？」

「佢想走又走到的話，我祝福佢。一個員工要離開，其中一個原因就係公司冇發展，或者發展方向唔適合佢發展，既然係咁再一齊落去對大家都冇好處丫。」

今日同大家分享呢個故事，唔係要話Chris呢套管理法則有幾好，而係想同大家一齊反思吓究竟「自己值幾多」 / 「同事對你黎講又值幾多」。

「自己值幾多」

唔少朋友都會覺得自己仕途不得志，是千里馬卻從未遇上伯樂，不如又問下自己，如果老闆叫你自己決定加幾多人工，你點答丫。

「同事對你黎講又值幾多」

老闆們與其口口聲聲話「員工係公司最重要資產」，不如又問下自己除左份糧，畀咗D咩同事？你又有冇信心講句「我公司的發展提供足夠空間畀同事成長？」

其實老闆同員工點計都係坐埋同一條船啦，船大船細唔緊要，最重要係舵手有明確目標方向，船上面大家幫幫手調帆，互相配合，唔使跳船之餘，船行得穩自然好快到岸啦。