阿懶：去連鎖快餐店冇幫襯 自備水樽齋斟水得唔得？

天氣熱到不得了，響應環保自備水樽出街，一唔覺就飲晒成枝水，要去便利店買支裝水補給，不過新近就下載了個免費app，詳列全港逾千個飲水機地點，仲有水機路線圖教你點去，十分方便。同班飯腳好姐妹提起，原來大家都是環保達人，有五花八門的撲水經驗，除了找鄰近免費水機補給，亦會去連鎖快餐店的水吧直接問：可唔可以畀杯水我？個別仲問你要唔要冰，相當好招呼。

事實上，不少大型連鎖店，近年大裝修後亦多備自助水機，有時食完早餐，路過都會順手為私家水樽添加。幫襯開要杯水順理成章，但亦試過貪方便，只是路人甲，入去齋斟水即較腳無幫襯。究竟，在商言商，入連鎖店齋斟水得唔得？有次，向在連鎖集團的大公關「告解」，她就猛安慰筆者，笑言打開門口做生意，總會遇上「人有三急要借廁所」的「潛在顧客」。

原來，無論「借廁所」還是「齋斟水」，其實早計算在成本之中。大公關說，每間連鎖店政策不同，難一概而論，不過以她工作的集團為例，新設的自助水機，除了可助減輕水吧同事的工作，亦為方便市民，只要不是斟走20加倫淋花，基本上不單不會干預，還十分歡迎。她打趣謂作為公關，其實極端渴望這樣一個場景：網友在社交媒體分享「連鎖店」免費供水好人好事，曲線宣傳，連搵天王拍溫情廣告的錢都慳番，真係幻想都想笑。

大公關果然是大公關，思路都特別過人。筆者覺得，小店和茶記剩飲雙計無辦法，大集團有能力搞「商界展關懷」，也是利己利人的雙贏方案，何樂而不為？事實上，自備水樽餐具出街，已是環保潮流，就如港大，早前就已宣布，校園內的餐廳、飯堂、超市和飲品售賣機，將停止出售一公升以下膠樽水，成為香港首間「向膠樽水說不」的大學堂，下一步並將考慮推展至膠袋及飯盒，積極推廣「減膠」。

根據環保署資料，2015年堆填區有約130噸膠樽，即每天有500萬個膠樽被丟棄。就是撇開地球生態的環保大問題，垃圾徵費最快於2019年推行，對每個市民來說，減廢已是「用者自付」的貼身問題，港大校園的先導性新措施，無疑值得反思和借鏡。作為關心銀包又關心社會的港女，響應減膠自備精美私家水樽，就如睇日劇學識垃圾分類一樣，是生活態度，你今日又自備咗水樽未？

 

文章只屬作者觀點，不代表本網立場。