十一少：炒樓要評估租金回報

炒股炒樓係香港人嘅發達方程式。適逢小股災，不如同大家講下投資樓市。其實炒樓，最重要除咗睇樓價升值，仲要睇租金回報率，原因太簡單，不贅。

就以近日入伙新鴻基（016）旗下海天晉為例，綜合市場資訊，現時租金回報率介乎3.4厘至4.4厘，呎租37.9至46元（扣除每呎4.5元管理費回報率仍近高達3.9厘），回報率算好唔錯。

將軍澳區租盤供應充足，係新住宅集中地，唔少樓盤租金自然受壓，例如長實（1113）峻瀅及峻瀅II、信置（083）帝景灣、會德豐（020）Capri的租金回報率只有2厘至3厘多水平，但海天晉租金回報率可觀，說穿了，就是因為經紀口中嘅「新地Premium」。

自問起初對新地樓冇咩認知，但早排好友捉咗筆者去海天晉行個圈，發現樓盤質素確係幾得。唔少傳媒都以海天晉嘅會所作為賣點，果然所言非虛，除咗泳池、兒童室、健身室，連飛鏢場、拳擊擂台、保齡球都有，像筆者一樣懶於出門的低碳族來說，算是個賣點。

講返買樓投資，海天晉於兩年前開售時呎價1.24萬元，低過呎價1.28萬的帝景灣。但現時海天晉租金回報率則勝過帝景灣。這說明一個道理，就是買樓跟買股一樣：買龍頭發展商。