阿懶：香港人哈日 日本人愛港

香港人哈日，遠近馳名，不單反映在港人旅日人次，以及人均訪日次數等數字，早前就有報道指日本美食，都是由港人發揚光大云云。筆者做旅遊雜誌的編輯朋友，就不時狂呻，做東京、大阪攻略做到悶，但現實是每次以這兩個地方做封面，銷量一定特別好，反觀花費人力物力，介紹歐美冷門名勝，十居其九銷量慘淡，所以亦不得不向現實低頭，新意嘛，留番給自己私人旅行先去。 

事實上，香港人對遊日的鍾情，已到非君不嫁地步，加上廉航當道，身邊就有不少朋友，就誇張到一年去六、七次，告一日假連週六日通宵機馬不停蹄，頻密程度自比「返鄉下」。不過我敢擔保，好多年輕人可能連自己真正鄉下在那，其實都不清楚，這也難怪，我哥姐的年代，學校手冊仲要寫籍貫，今日不少學生，熟日本地圖多過中國地圖，想深一層，其實幾悲哀。 

日人讚香港高效方便 雙層巴士成至愛

不過有趣的是，部分港人急不及待與內地切割、又嚷著要移民離開香港，覺得在原宿就算一樣做個侍應，都一定型過在香港做。但偏偏，就有一班日本人，視香港為理想之都，千方百計都希望留在香港生活，愛港之情，令我這個土生土長的港女亦感慚愧。事實上，我就識得幾個京都朋友，經常說退休後想定居香港，覺得香港有效率又方便。簡單如由紅磡出旺角，上巴士15分鐘車程，她們已大感驚奇，說像用了叮噹的隨意門。 

日本人對坐雙層巴士亦情有獨鍾，一定揀樓上車頭位，說單單可以居高臨下看城市風景，已覺得超爽勁爆。此外，香港人愛日本超市整齊乾淨，琳瑯滿目，日本人就最愛去香港街市看生劏活魚，覺得好勁。我這個愛剎香港的京都朋友，就試過在上環街市，睇豬肉佬將成隻豬斬件，企足半粒鐘都唔捨得走；又說好羡慕我家樓下就有超市⋯在日本人眼中，香港隨意又有效率，非常羨慕。 

狂掃菠蘿包特別版Tempo 

不過，數最誇張是堅持要打包一打菠蘿包回京都，另如狂掃特別版Tempo，中國茶包如普洱茶、鐵觀音、香片之類做手信，更加不在話下。說起Tempo，好多人都奇怪日本人為何情有獨鍾。原來亦有近因遠因，話說日本人愛用手巾仔，地道紙巾多是街邊賣廣告任派，薄如蟬翼，在日本的Tempo廣告，就針對這一點，說Tempo比一般紙巾厚，有用手巾仔的感覺，是抹鼻涕和抹汗佳品云云。 

在一輪廣告攻勢下，加上香港最多地道特別版，自然成為遊港最佳手信。其實坐這山望那山，是人類特性，有人就曾打趣謂：旅行的真義，正是去一個當地人住到厭的地方，所以在外國，就有人設平台，供登記的人交換屋居住，尋求生活上的新鮮感。只要細心留意，每個地方都有它可愛之處，只是住得耐習慣了無知無覺，不信，上外國旅遊網，找找介紹香港的旅遊資訊吧，你可能會驚嘆：咩香港原來咁好玩架？ 

 

文章只屬作者觀點，不代表本網立場。