阿懶：原來真係人人都想做KOL

透過網絡紅人KOL推廣品牌，代替廣告硬銷成新趨勢，傳統傳媒廣告盈利被分薄叫苦連天，但新一代對這份不用返朝九晚五，又似網絡明星的新興工作，卻都趨之若鶩。新近，這團火竟然殺到埋身，上星期和表姐見面飲茶，這個在公司指揮若定的能幹媽咪，竟然呻到葉落，她說以前追睇各路KOL的文章、短片，覺得有趣又過癮，今日睇就百般滋味。 

何解落差這麼大？原來是與他的90後寶貝仔有關。話說，名牌大學畢業的寶貝仔，行完畢業禮同阿媽訴盡心中情，開宗明義話先唔想打工，希望拍片，搞創作，放上網搏做KOL，認為只要受歡迎有知名度，自然財源滾滾，代言廣告不絕，試問世上有那份荀工可以「著住孖煙筒上網寫嘢就有錢收」？ 

阿表姐説正當她仍在消化「係咪咁筍」之際，最致命一擊是寶貝仔和她分享一條「越洋網上冧女」直撃短片，指手劃腳興奮表示這位拍片素人一擊即中，短片紅爆網港台，仲翻炒斬多幾兩（或曰乘勝追擊），拍多段「越洋網上冧阿媽」短片。向以潮媽自居的表姐直言聽到O曬咀，問我是否代溝嚴重，真心唔明這類「真人騷」有咩好睇，更擔心有朝一日，阿寶貝仔鏡頭對準自己，要拋頭露面交戲，支持阿仔創業真正無陰功云云。 

表姐呻到葉落，我就聽到哭笑不得。其實這股KOL風吹咗好一陣，阿嬌金句「你估人人拍拖，唔通人人都想拍拖」，怕且都要變奏成「人人做KOL原來真係人人都想做KOL」。所謂「KOL」，全稱「key opinion leader」，中文直譯為「關鍵意見領袖」，近年在香港成為網絡術語，大致與「網絡紅人」掛勾，泛指在社交網絡有一定數目追隨者，並可藉此網絡作推廣的人。 

事實上，全民皆網，近年確造就不少新興行業，除了所謂的KOL，亦出現因各路KOL應運而生的中介公司，不同合作模式，既有in house亦有外判，一遇客戶要宣傳或遇關公災難，即號召發功，或催谷或救亡，市場有供有求，造就大班海鮮價KOL活躍市場。這份年輕人引頸以待的「筍工」係咪咁荀？自由工作又係咪咁自由？我自認老餅，真的不知道。 

不過有公關老友就笑吟吟，叫我同表姐講順其自然，身為老豆的他，笑謂家陣年輕人都「很有主見」，如果家境不俗，家長阻都無用，就等佢讓市場洗禮。不過如果屋企等開飯，就要諗清楚，雖然呢位大公關表示不信今時今日仲有懷才不遇，但就如娛樂圈，永遠都有天皇巨星和暗星，人人想做結衣BB，唔通個個都係結衣BB咩？ 

 

文章只屬作者觀點，不代表本網立場。