黎倩蕾：將三把火變身養生下火好酒

荔枝大豐收，賤賣都無人要，其中一個原因，是不少人都擔心荔枝的「三把火」，加上之前媒體廣泛報導，指荔枝美味但要適可而止，有說甚至五粒為限，若真的以此為標準，就算$10一斤糯米糍平霸港九，小倆口子的家庭，買兩磅就分分鐘要食足一星期。

不過，我那慳家廚神老友，就説趁低吸納無有怕，說用荔枝為原材料的副產品多的是，除了荔枝醬，也可自家製荔枝酒，做法較浸梅酒更簡單，最快3個月有得飲，品酒之餘，仲可以食埋粒荔枝，非常划算。不說不知，新鮮荔枝一粒三把火，但古人就相信，以荔枝浸的酒，是以毒攻毒的下火之物，非常有益。

用平霸荔枝浸酒原來好簡單

今年荔枝賤賣無人要，但昔日荔枝卻是矜貴食材，唐朝時更是不可多得的貢品，為保存荔枝味道，就以浸酒方法保鮮，不只是滿足口腹之欲，也是民間傳統智慧，有益氣健脾、養血益肝之效。事實上，浸酒講求時令，像3、4月會浸梅酒，夏天有荔枝龍眼，冬天會浸補身的酒，像杞子、圓肉。

至於做法，廚神老友就話其實各施各法，最多人用的菜譜，是將冰糖、米酒、荔枝放入玻璃瓶內，浸三個月便大功告成。但她說浸酒好講個人口味，不同材料會有不同味道，酒可以用米酒、清酒，甚至本身已帶甜味的桂花陳；糖則除冰糖外，可用紅糖、黑糖等。就是去核與否，亦分兩派，去核派指核令酒變苦，不去核派指實驗證明其實無分別，那不如懶少少慳工夫。

講咁耐，㕑神又會點整？她說喜歡用帶甜的桂花陳做酒底，今年適逢荔枝大豐收，甜度足又夠大粒，買來浸酒，平過落糖，索性狂加走糖，且通常會加碼浸足半年以上。味道如何？她笑說要等開封先知效果，這正是浸酒的樂趣。講咗咁多，大家係咪躍躍欲試呢？