稱政府應承擔侍產假開支 鍾國斌：你請客點解要商界埋單？
立法會議員（飲食界）張宇人早前直指「侍產假一日都唔應該有」，引來譁然，其黨友、自由黨黨魁鍾國斌估算侍產假3日變5日後，商界每年在侍產假方面的開支增至逾億元，斥政府應自己承擔而非慷他人之慨，「你請人食飯會唔會叫人家代你埋單？係都唔好意思啦下話。」他批評現屆政府上場僅一年多，就一次過將多項勞工議題「擺上檯」，「辣咁多火頭出黎做乜嘢呀？一樣都未做完，就去搞第二樣！」但他承認侍產假「嚴格嚟講多兩日唔係咁大問題」，法案提交至立法會時自由黨「應該都唔會反對」。
更多侍產假專題文章：
張超雄：七天侍產假僅為卑微要求
微企爸爸反擊張宇人 豪送一個月全薪侍產假
新手爸爸湊B神器逐樣捉 輕鬆侍產冇有怕
增加兩日後開支逾億元
鍾國斌接受《思考香港》訪問時指出，現時每年大約5萬名嬰兒出生，倘將來侍產假增至5日，即全港僱主一年共需提供25萬天假期。按照入息中位數約15,000元推算，即大約日薪500元，「成本都係以億計嘅錢」。能否預測實際營運開支會增加多少百分點？「我答你唔到，我點知人地個百分比，開支可以開到幾多。」
他坦言侍產假對商界「係有限數，微不足道」，澄清自己並非反對。不過「政府一下子攞咁多勞工issue(議題)出嚟，就令我地覺得好反感。」列舉包括取消強積金對沖，將強積金供款上限提高至2400元，及女性產假10周變14周等，「你使唔使一下子攞咁多嘢出嚟，可唔可以逐樣做完，消化一樣再消化一樣。」
政府早前交代取消強積金對沖的初步方案，建議設12年期補貼。對於侍產假，鍾國斌認為由政府「找數」亦是最理想，甚至不應只作過渡性補貼，而是永久承擔。「第一佢水浸，財政預算（儲備）萬幾億；第二，呢樣係政府要立既例，即係話佢請客……政府想做好人，想話好多福利比僱員，你想做點解要商界埋單？」
加兩日無助婦女產後問題
有研究指侍產假既可讓丈夫幫手減輕產婦負擔，紓緩她們情緒，亦可提高僱員生產力、歸屬感。鍾國斌指「呢啲道理永遠係啱」，但增加兩日作用有限，「老實講一個BB出世，真係可以要比較強壯啲，而家人地講百日宴，起碼都一百日啦，咁你三日、五日、七日，係有少許幫助，不過唔係話就可以解決產後問題……女性係有產後抑鬱，或產後其他後遺症嘅，三五七日係唔足夠，當然叫好過冇。」
在立法會代表 紡織及製衣界，本身經營織造廠的鍾國斌指，公司在侍產假方面都是跟足法例（3日），但員工有特別要求亦可「有商有量」。「香港所有老闆，唔係話唔支持某樣嘢就等如無良，如果香港咁多無良僱主，好多公司都唔會存在成功啦！或者好多僱員都唔會係到打工打咗一段長時間。」他說自己公司內服務年期最長的是一名女性員工，已任職28年。
「張宇人好多頂帽」料仍須支持政府
被問自由黨4席在立法會投票取向，他說法案未提上大會，未須作最後決定，「但上次立法三日時支持得，加多兩日唔會好大異議。」黨主席張宇人早前明言反對，鍾解釋張宇人「好多頂帽，講緊侍產假嗰段時間，佢係戴緊飲食界個頂帽」，但對方作為行會成員，理論上要站在政府立場。
