自攜水樽又想飲蒸餾水？「環保補水站」會展有得試

出街唔想買樽裝水？維他蒸餾水就決定設置「環保補水站」，為自攜水樽的消費者提供方便而乾淨衛生的水源，又可減廢，支持環保。

不過「環保補水站」暫時得兩個，皆設置於灣仔香港會議展覽中心(港灣便利店附近及展覽廳 1A 大堂外)，去開會展睇展覽以後又多個飲水選擇。補水站本月初已經運作，可提供200 毫升、400毫升及600毫升蒸餾水，使用簡單方便，只要把水樽放入注水間，選擇容量及溫度，再以八達通卡付款便可。

另外，飛雪亦都開始試行「Bonaqua冷熱加水站 」，早前已經設置在佐敦京士柏運動場和水浪窩附近的企嶺下燒烤場，日前更在「香港迪士尼樂園 10K Weekend 2018」馬拉松試行。相信兩間公司將來會有更多水站提供服務，又或者大家不妨下載「撲水」手機應用程式，一次過睇晒港九新界免費加水機的位置。

(網上圖片)