【平民投資教室】錢俊：管理MPF唔可以懶
有報道指四月MPF平均蝕5.6%，連續第四個月出現虧損，年初至今更累挫10.8%。要知道呢個只係平均數，如果買重中國及大中華股票，更可能蝕超過20%。對臨近退休或預備移民嘅投資者嚟講都幾灰。若果你有計劃退休或移民，宜積極啲檢視自己嘅強積金投資。
強積金點分配，個個人嘅人生階段唔同，應該有唔同配置。傳統智慧係120減現時歲數去計算。比如你今年40歲，120減40就係80，即係最理想你投資80%喺股票，20%喺債券。然後每幾年按當時年齡再調整比例。
市面上強積金供應商喺選擇上有一個叫「預設投資策略」，俗稱懶人基金，大概都係以上述方式，喺你年輕時會投資較高股票比例，臨近退休就會有較高債券比例，而且行政費會比一般基金選擇低。但錢俊就唔多建議，因為股票比例喺最年輕時都只係大概60%，要有成40年先退休嘅打工仔買成40%債券，係可以嚴重拖低未來回報；同樣去到年老65歲只有約20%股票，投資者可能仲有幾十歲命，過多債券比例難追上通脹。
此外，間間供應商都有「增長」、「均衡」、「平穩」等差唔多名嘅基金選擇，提供俾唔同階段投資者，平衡股債配置。然而錢俊都唔太偏好。因為大多呢類基金持有嘅股票都以中港市場為主。有睇開錢俊文章都知，中港股票無論喺波動性同長遠回報都比歐美為差，股票部分若以中港股票嚟做膽，對一般唔多時間睇住個市嘅投資者嚟講唔係最好嘅選擇。
所以錢俊認為叫a la carte比食ABC餐理想。懶人而言，可以用120減歲數方式，喺「環球債券」同「環球股票」兩個選擇之間自行調配。尤其是環球股票中，宜仔細睇吓投資地區分配，係唔係主要以北美為主。當然如果認為自己對市場熟悉，都可以選擇唔同地區嘅基金嚟自己砌，前提都係美國為主，其他地區為副。
AOR：懶人ETF
如果你退休或移民，拎晒啲錢出嚟之後，可以點做？除咗考慮錢俊之前講過嘅移民ETF投資組合，都可以搵啲切合自己風險程度嘅股債ETF。
類似嘅ETF包括iShares Core Growth Allocation ETF（US:AOR），股債比例約為六比四，正正就係60歲可接受嘅股票比例水平。基金主要買iShare自家ETF，以美股標指及美債ETF為主，同時亦加入非美國嘅股債ETF以涉足環球市場，以及美國中小型股ETF。回報方面，過去10年約做到每年4.8%，跑嬴通脹有餘，而且最差情況亦只係跌13.5%。想淨係買一隻ETF唔想煩都係一個選擇。
然而，派息只係做到1.5%，若果要靠派息生活可能未必足夠。管理費雖然只係0.15%，但其實只要你花少少時間，自己定吓股債分配比例再自己砌ETF組合，可以慳返個管理費之餘，仲可以有多啲靈活性，比如買啲港股或息率較好嘅工具以拉高派息。
以上觀點僅為個人分析，並不構成任何投資建議。
文章只屬作者觀點，不代表本網立場。
