黎倩蕾：減肥是終身事業　炎炎夏日下的數字人生

都說減肥是女人的終身事業，尤其是炎炎夏日，但原來對於男人來說，講到瘦身，同樣好重要。話說身邊又有男性單身貴族，乖乖向營養師交出五位數字學費，重整日常飲食清單，仲大手筆委托代煮宅送服務，說要慳出煮飯時間做運動雙管齊下云云，一派不成功誓不罷休的樣子。

能夠讓我身邊這個出名孤寒的男士下定決心付費，當然不止是「靚仔啲」、「有型啲」這樣簡單，而是人到中年，受到體檢結果刺激，包括發現好多健康指標都不合格，BMI爆標，膽固醇亦過高，仲有輕微脂肪肝，再不正視，擔心隨時搞出大病，到時真正得不償失。

早年食藥減肥大行其道，但引發的問題多多，為健康減肥的人固然卻步，就算愛靚唔愛命者，亦擔心瘦到一面病容，有違最緊要靚的「人生追求」乜乜乜，故此，近年找營養師健康瘦身，基本上已成大趨勢，身邊不少朋友每日早上的首要工作，就是計算是日三餐卡路里，名符其實的數字人生，成為有趣的生活日常。

少油少鹽少糖，衞生署的宣傳強勁，大家早耳熟能詳，但原來要減得健康，在營養師眼中，早餐不可少，調節一日三餐或四餐，除了食得健康，也要食得定時。不過不少人的經驗之談是：計數容易，但要實行卻很難，尤其是上班族，能負擔宅送高昂收費，還得忍受番熱預製食物的「太空餐感覺」，淡而無味，仲要覺得唔多新鮮，能否持之以恆，是成敗關鍵。

所以減肥衆生都猛諗計，有減肥朋友就冰箱買定大包雞胸和不同急凍魚，預先解凍成一份份的一人份量，晚上睡前先放下格解凍，早上起床就趁擦牙後早餐前的空檔，快做一個健康便當，最簡單莫如魚上加少少香草黑胡椒，開火蒸5、6分鐘，配菜可以是水煮粟米甘荀豆角，以及飽肚的螺絲粉之類。

營養均衡但快手的話，只需十分鐘搞掂，簡單又方便，既然減肥是終身事業，大家就加把勁，趁炎炎夏日有個好開始，食得健康吧。