【平民投資教室】錢俊：跌市除咗坐貨同喊仲可以做乜？
美國聯儲局加息陰霾加上俄烏局勢緊張，唔少人見到美市跌得急隨即轉投港股，結果上周五美團出一個新聞就被割韭菜，恆指輕觸25000轉個頭又下試23000。
跌市時最多人講，係調整心態。如果你係懶人長線投資，只要做好風險管理，分散投資，歷史上主要股票市場係會返家鄉。S&P500為例，2007年起經歷金融海嘯跌最多50%，用咗四年半返回高位。恆指2007年10月破頂到31600，用咗10年喺2018年1月先平返。然而，唔好忘記等待期間仲有派息。反之，如果你成副身家買晒一隻股份，就除時返唔到轉頭。依個就係點解建議各位平民買ETF嘅原因，無咁大個頭就唔好戴咁大頂帽。
心態之後，除咗坐以待斃，不如主動出擊。第一招，溝貨。如果你相信歷史會重現，你喺低位加倉，就可以將返家鄉嘅時間縮短。至於幾時出擊，就算了解金融環境及技術分析嘅投資者都會損手，所以最理想就係按時分段吸納，由時間去幫你做決定，最好就定額定時投資，所以依家開始設立月供計劃就啱晒。
第二招，轉倉，檢視一下現有配置是否適合。比如之前覺得美股貴坐咗大量港股或債券，依家就係逐步換貨之時。當然會有人覺得現金為王，跌市應該斬倉為妙。但拋售變現同時產生機會成本，若果市況好轉就蘇州過後無艇搭，塵世間最痛莫過於升市無貨，比跌市大家圍爐取暖更揼心口。
有評論指通常美國展開第一次加息之後，股市大多會回穩並向上。2015年開始息口由0.25厘加到2019年嘅2.5厘，美股三大指數仍不停創新高，港股亦由2016年開始牛市至2018年恆指見33000新高。就算換貨買錯市場，只要仲有貨，仍有機會係笑到最後。
今輪跌市之中，銀行股可謂抗跌能力最強嘅板塊之一。有指係因為銀行相對受惠於息口向上。銀行嘅業務傳統上以收人存款再借出去賺差價。當進入加息周期，銀行放貸利率通常會比資金成本上升得較快，形成所謂淨息差擴大，有利銀行邊際利潤。另外以市場需求嚟睇，跌市之時，投資者傾向買派息穩定嘅公司，至少坐貨都仲有渣拿。
華夏香港銀行股ETF（HKG:3143）追蹤納斯達克香港銀行股指數表現，持有21隻本地上市嘅銀行，包括匯控、建行、工行，而呢三隻已經佔成份股近半。表現嚟講，年初至今升咗17%，喺本地ETF當中名列頭五。
然而錢俊有幾個考慮。現時銀行除放貸以外仲有好多業務，比如銷售金融產品，同時借錢人質素及額度與經濟都直接掛鉤，如果加息過快，或者本地因疫情防控而導致經濟衰退，一樣會攬炒。
其次，基金雖名叫香港銀行股，入面其實有超過50%成份係國內銀行。美息預備加嘅同時，中國卻反其道而行加碼放水，同樣道理下，內銀前景未必樂觀。參考匯控年初至今已升25%，建行就只升12%，後者明顯跑輸。最後就係管理費要0.45%，唔算得上平。如果純粹想食港銀受惠加息呢條水，揸匯控或渣打可能更為划算。
文章只屬作者觀點，不代表本網立場。
