阿懶：「咩叫GFable？」Out爆阿媽輩潮語再培訓

一大朝早，即收到大姑母whatsapp，問我：咩叫GFable？她說剛剛看到報紙娛樂版專訪發嫂，個執筆記者開口埋口寫GFable，看得她這個老人家一頭霧水，所以好奇一問。原來如此！上一代的父母，總叮囑孩子多看報紙學寫作，今日風水輪流轉，父母輩甚至祖父母輩，就要看報睇網學潮語，果真是十年河東十年河西。 

其實，又難怪大姑母看不明白，其實我都是因為有班九十後同事和千禧後姨甥女，先勉強跟得上時代，不過都不時追到氣咳，盡全力都只見到車尾燈閃呀閃，深覺要打破隔代鴻溝，只有誠意都未夠，成敗關鍵是要有時間。其實所謂GFable，是港式英語Girl Friend-able，意即「適合做女友」，專門形容一啲令到男仔好有衝動想「和你在一起」的女孩子。 

顧名思義，這個近年網絡興起的新詞，當然由男生想出來。因為大姑母一問，我真的上網研究了一輪，原來，GFable在討論區是巴打們的熱門話題，意思近似女神，但又不似女神般高不可攀，即是貼地到可以做女友的女生。究竟在新一代男生眼中，GFable要有甚麼特質，人言人殊，爽朗不造作不化濃妝但天生麗質獨立得來適當時間又會千依百順，大抵是男生眼中GFable的主旋律。 

有人甚至指「肯食譚仔」就已經GFable，就好似報紙專訪林鄭，話80萬公屋封頂就夠一樣，簡化到咁，GFable似乎易過借火。 

講起潮語，更替速度真的快過打針，除了GFable，隨便上一陣網，你都會見到潮語滿天飛，由「講還講唔好貼圖」到「圍爐打飛機」，另如放閃避閃網紅KOL，更加用到氾濫，睇怕倒數2017，這些人人說上一咀的潮語，亦會好快變out。 

究竟追逐潮語係咪有意義，我既不是學者或乜乜評論員，沒甚麼獨有見地，也不是語言學家，無意深入研究，但作為一個生活在群體之中的正宗港女，就覺得識番兩咀潮語，確實已成為生活所需，至少，不過被定性為異類。試想，今日的年輕人，活在社交網絡下，唔識GFable？睇怕不單唔會被視為好pure好true，而是離地古代人吧？ 

 

文章只屬作者觀點，不代表本網立場。