斯汀:100毛上市 STAKK執笠 點解咁大分別？

近年唔少media結束，無論電視、電台、雜誌都各有代表，大家紛紛認為以後係網媒嘅天下。但係估唔到，一個主page有70幾萬likes、外加子page20萬likes嘅STAKK會突然摺埋，亞視執笠、DBC遣散、壹仔賣盤都有過渡期，而被炒STAKK員工就親口表示，真係即日先知道！STAKK同100毛基本上係近年品牌做得最好、最多年青人睇嘅page，何解一個會上市、一個會執笠？

唔計前期籌備，STAKK正式面世大概一年半，一路可謂順風順水，各個page like數加埋直逼百萬，廣告多到接唔哂（事實係佢哋真係推好多廣告，同時有好多好多品牌想搵佢哋都無回音），外人睇落都會覺得佢哋好成功，仲係唔少media想模仿嘅對象。但係實情，佢哋又係唔係真係咁成功？咁就要睇吓你對成功嘅定義。

以搞一個page嚟講，唔低俗（性題材都包裝得好正經）、唔政治、唔偷片純原創，都可以咁短時間有咁好成績真係超級成功。但係呢一份成功背後，靠嘅係一份有錢的任性，而家有邊個page係唔洗跑數追page views？香港01直情有專人統計邊個記者成績最差，會作為升職或者炒人指標！而STAKK其實係有個page（http://www.stakk.com/）又有邊個知？再加上一開始李澤楷已經話咗注資千萬美元，有大水喉射住仲唔需要跑數，全心全意做想做嘅內容去谷facebok page，呢條起跑線，比全港網媒好太多了吧！

但係以賺錢角度，又算唔算成功呢？嘩，廣告接唔哂，一定搵好多啦，之不過佢哋洗得仲多呢！STAKK最高峰時期有近百員工，當中content team（即係諗橋同出鏡嘅STAKKER）同production team（攝影師同剪片）加埋都係30人，其實呢30個前線員工已經足夠生產短片，亦係一般網媒嘅規模，咁另外嗰70人係咩呢？包括幾位it同事、幾個分析組、10個動畫組（不屬production team）、10個設計組、其餘就係admin同埋一啲「策略師」等嘅人。呢個比例有少少上重下輕，上層比意見嘅人多，下層做實事嘅人少，而上層人工隨時係下層幾倍，所以導致接唔哂廣告，無疑係一種浪費，CP值太低喇。

你可以話係因為咁多人先可以做到有質素嘅片，但係內部好多人都唔係咁諗，員工都唔係好滿意呢個架構，而人浮於事嘅情況都幾嚴重。再加上STAKK嘅人流動得快，連高層都可以成日換，朝令夕改之下，每日OT到凌晨係等閒事，呢間外人睇落「好好玩」嘅公司，其實前線員工長期每日都返15粒鐘以上，前線員工之間有深厚感情，但係就對公司冇歸屬感囉。

炒人消息一出，唔少單位即刻準備搶人，的確，STAKK造就咗好多為人熟悉嘅面孔，前期後製嘅功能都得到大眾肯定，不論大media、小小網媒、還是個人品牌，都急不及待想搶返幾件（甚至有財大氣粗嘅網媒話「全部要哂！」）。不過，就算你請哂全公司嘅人，都唔代表你可以做到STAKK 2.0，你哋提供到嘅自由度、工作模式都好難同STAKK一樣；而如果你只打算搶一、兩個人就改變到自己個page，就真係想睇太多喇，你有冇一team可以一齊日日OT到凌晨，完全無自己生活嘅人去幫忙先？（咦，咁似100毛嘅？成功formula GET！）

既然STAKK同100毛都咁受歡迎，點解兩日個結局差咁遠？或者可以想像成，100毛老闆係創業，想搵錢搵錢搵錢，公司就係一切，你入去做就好似嫁比個窮人同佢一齊奮鬥、一齊賺錢；STAKK老闆本身已經係大財主，你入去做就係嫁比一個有錢人、好煮好，但係當某一日比人玩厭或者「其他原因」，你就可以講定拜拜喇！